Nagpasidaan si PBGen Christopher N Abrahano, Acting Regional Director sa National Capital Region Police Office (NCRPO), nga manubag sa balaod ang bisan kinsa nga manakit sa mga pulis ug mohimo og kasamok taliwala sa mga lihok-protesta.
Nagsumikad kini sa komosyon sa Liwasang Bonifacio niadtong Nobyembre 15, 2026 diin 15 ka mga pulis ang naangol samtang nagbantay sa demonstrasyon dungan sa 49th ASEAN Summit.
Nasayran nga nakabalik na sa ilang katungdanan ang tanang naangol nga pulis human mahatagi og medikal nga pag-atiman.
Bisan og giila sa NCRPO ang katungod sa malinawon nga panagtapok, gihingusgan ni PBGen. Abrahano nga wala kini naglakip sa pisikal nga pagpanakit ug pagbabag sa operasyon sa kapulisan. Gimandoan usab niya ang mga hingtungdang yunit sa pagtigom og mga video ug ebidensya aron mapasakaan og kasong kriminal ang mga responsable.
Dungan niini, gipahinumdoman niya ang mga pulis nga magpabiling propesyonal, ipatigbabaw ang maximum tolerance, ug tahuron ang tawhanong katungod. Gipasalig usab niya nga dili konsintihon sa NCRPO ang kapintas batok sa mga pulis lakip na ang bisan unsang pag-abuso sa gahum aron mapadayon ang kahusay sa tibuok ASEAN Summit.
“Let this be clear: we will not allow violence against our police officers to go unanswered. Our personnel are there to perform their duties and protect public safety, not to become punching bags for anyone who chooses to defy the law. Those who assault them will be held accountable,” mensahe ni PBGen Abrahano.