Sa pagpapatuloy ng layunin ng Department of Social Welfare and Development (DSWD) Field Office Caraga na masuri ang pagiging epektibo ng convergence strategy ng ahensya sa pagbibigay ng serbisyo sa kanilang mga partner-beneficiaries sa ilalim ng Pantawid Pamilyang Pilipino Program (4Ps), ang mga miyembro ng Regional Advisory Committee (RAC) ay nagsagawa ng tatlong araw na monitoring at pagbisita sa mga field mula Agosto 6-9, 2024.
Ang naturang aktibidad ay isinagawa kasama ang mga miyembro ng Provincial Advisory Committee (PAC) at City/Municipal Convergence Advisory Committee (C/MCAC) sa San Jose, Probinsya ng Dinagat Islands. Isa sa mga pangunahing usapin na tinalakay sa pagbisita ay ang patuloy na pagsubaybay sa mga batang benepisyaryo hanggang sa pagtatapos sa tersaryang edukasyon, kahit na lampas 18 taong gulang.
Dahil dito, nagpaplano ang DSWD at mga kinatawan ng Caraga sa Kongreso na magmungkahi ng mga pagbabago sa batas na naglalayong palawigin ang saklaw ng edad at pagtaas ng mga grant para sa mga batang benepisyaryo.
Ang nasabing pagbisita at monitoring ay isinagawa sa mga lugar na may mataas o mababang pagsunod sa mga pamantayan ng kalusugan, edukasyon, at Family Development Sessions (FDS).
Sa pamamagitan ng masusing pagsusuri at patuloy na monitoring, umaasa ang DSWD na ang mga programa tulad ng 4Ps ay magiging tulay para sa mas maunlad at masaganang kinabukasan ng bawat Pilipinong nangangailangan, lalo na sa mga rehiyon na may mataas na antas ng kahirapan.
