Gisaolog sa mga tribu, katutubo o lumad sa Local Government Unit sa Quezon, Bukidnon ang 2024 Indigenous People’s Month Celebration ug 27th IPRA Law Commemoration nga adunay temang “Mga Katutubo at Katutubong Dunong: Pahalagahan, Pangalagaan, at Parangalan” nga gipahigayon sa Heritage Hall, Libertad, Quezon, Bukidnon adtong Martes, Oktubre 15, 2024.
Ang kasaulogan gihimugatan sa buotang Mayor sa Quezon, Bukidnon nga si Mayor Poling Lorenzo.
Matud pa sa mayor nga kinahanglan tagaan ug importansya ang mga katutubo sa komunidad. Kini gipamatud-an gayud pinaagi sa pagsakmit sa Kaamulan 2024 Ground Presentation Champion diin dayag kaayo nga kung unsay kaya sa uban, kaya pud sa Tribo Manobo.
Sumala pa ni Mayor Lorenzo nga pinaagi sa panaghiusa, makab-ot ang kalampusan.
Ang LGU Quezon andam mohatag ug trabaho sama pagsemento sa kadalanan na makatabang sa paghatud ug produkto ug serbisyo sa kabukiran.
“Dili [mo] pwede ma biyaan. Apil kamo (Lumad) sa kalamboan sa Quezon… but above all, dili kalimtan ang kultura. Ang pagka Manobo dili ikaulaw kun dili, ika proud. Maniguro ta nga naa gyuy pwede nato nga ikapasigarbo… mao na ang hagit.” dugang pa ni Mayor Lorenzo.
