Opisyal nang binuksan sa publiko ang skills fair na tinawag na Kahigayonan 2025: Piyesta sa Dakbayan: Tabo sa mga Oportunidad Year 4 na ginanap noong Lunes, Agosto 11, 2025 sa Ayala Malls Activity Center, Cagayan De oro City.
Pinangunahan mismo nina Oro Youth Development Officer-in-Charge Lord Saver “Vhaugne” Centina, Sangguniang Kabataan Federation–Cagayan de Oro President Kenneth John Sacala, at mga miyembro ng Out-of-School Youth Development Alliance (OSYDA) ang pagbubukas ng nasabing aktibidad.
Ilan sa mga tampok na handog ng programa ay ang iba’t ibang skills exhibit at training application, gayundin ang livelihood at entrepreneurship assistance, scholarship orientation, UY Talks o inspirational talks para sa kabataan, at paligsahan sa sayawan. Dumalo at nakibahagi rin sa nasabing programa sina University of Science and Technology of Southern Philippines (USTP) Extension & Community Relations Division Director Dr. Maria Teresa M. Fajardo, Technical Education and Skills Development Authority (TESDA) X Director Marigold Cherie R. Garrido, Department of Trade and Industry Misamis Oriental Provincial Director Jesusa Abear, Department of Education School Division Superintendent Dr. Roy Angelo Gazo, at Department of Interior and Local Government (DILG)–Cagayan de Oro City Director Ellaine Josephine B. Depaur, DM, CESE na nagbigay ng kani-kaniyang mensahe.
Magpapatuloy ang Kahigayonan Year 4 hanggang Agosto 13 bilang bahagi ng pagdiriwang ng International Youth Day at Oro Youth Month na ginaganap tuwing buwan ng Agosto.
Layunin ng Kahigayonan 2025, na magbigay ng iba’t ibang oportunidad at kaalaman sa kabataan, partikular sa larangan ng skills training, kabuhayan, at edukasyon, upang sila ay maging mas handa at may kakayahan.
