Gipahigayon ang usa ka hiniusang tigum sa mga taas nga opisyal sa pulisya ug militar sa Joint PNP-AFP conference nga gihimo sa Camp Datu Akilan Ampatuan, Maguindanao del Sur Police Provincial Office karung Buntag sa Sabado, Abril 2, 2026.
Gipangulohan ang maong panagtigum ni Police General Jose Melencio Nartatez Jr., Chief, Philippine National Police, kauban si Western Mindanao Command (Wesmincom) Commander Lt. Gen. Donald M. Gumiran.
Mitambong usab sa tigum sila Joint Task Force Central ug 6th Infantry Division Commander MGen. Jose Vladimir Cagara, 601st Brigade Commander BGen. Edgar Catu, Police Regional Office BARMM Regional Director PBGen. Jaysen De Guzman, ug ang bag-ong napiling Provincial Director sa Maguindanao del Sur PNP nga si Police Colonel Michael John Mangahis.
Tumong sa maong panagtigum ang pagpalig-on sa koordinasyon ug panaghiusa tali sa Philippine National Police (PNP) ug Armed Forces of the Philippines (AFP), ilabi na sa aspeto sa seguridad ug pagpatuman sa balaod sa rehiyon.
Gihisgutan usab sa tigum ang mga lakang aron malikayan ang mga insidente sama sa mga ambush, lakip na ang pagpausbaw sa intelligence sharing ug hiniusang operasyon sa mga lugar nga giila nga hotspot sa probinsya.
Kabahin kini sa padayon nga paningkamot sa gobyerno aron mapadayon ang kalinaw ug kahusay sa Maguindanao del Sur, human sa nagkalain-laing insidente nga nisangpot sa pagkamatay sa mga pulis sa rehiyon.
Lakip usab sa gihatagan og dakong pagtagad ang pagpangandam sa security forces alang sa umaabot nga BARMM parliamentary elections nga gikatakdang ipahigayon sa Septyembre 14, 2026.
Gilauman nga magdala kini nga tigum og mas lig-on nga mga estratehiya ug mas paspas nga pagtubag sa bisan unsang hulga sa seguridad sa rehiyon.