Nagpahigayon og Mental Health Awareness and Stress Management Seminar ang mga estudyante sa Bachelor of Science in Nursing (BSN 4C) sa San Isidro College niadtong Nobyembre 5, 2026, sa Miglamin National High School, Malaybalay City, Bukidnon.
Ubos sa tema, “MIND MATTERS: Building Resilience, Managing Stress, and Promoting Mental Well-Being,” ang kalihokan nga gitambongan sa mga estudyante sa Grade 9 ug Grade 10.
Tumong niini nga mapalambo ang ilang kahibalo bahin sa mental health ug matudloan sila sa hustong pamaagi sa pagdumala sa stress ug adlaw-adlaw nga mga hagit.
Gipahigayon ang diskusyon ni Ms. Shelleme Organiza Macatol, RN, EMT, usa ka mhGAP-trained nurse ug Program Coordinator nga nagrepresentar sa City Health Office (CHO).
Iyang gihisgotan ang kahinungdanon sa mental health awareness, kasagarang hinungdan sa stress, emosyonal nga mga hagit, resilience ug positibong pamaagi sa pag-atubang sa mga problema.
Gipasiugda usab niya ang pag-ila sa sayong mga timailhan sa emosyonal ug sikolohikal nga kalisdanan, lakip na ang pagpangayo og tukmang tabang ug suporta kon gikinahanglan.
Pinaagi sa maong kalihokan, gidasig ang mga estudyante sa pag-atiman sa ilang mental ug emosyonal nga kahimsog, pagpalambo sa positibong coping strategies ug pagpalig-on sa ilang kalig-on sa pag-atubang sa mga hagit.
Pinaagi sa pakigtambayayong sa CHO, gipakita sa BSN 4C sa San Isidro College ang ilang suporta sa pagpalambo sa mental health awareness ug paghimo og palibot nga matinabangon, masinabtanon ug walay diskriminasyon batok sa mga tawo nga nakasinati og problema sa mental health.
Report: Mhegan L. Dominguez, CHO-NADA