Ang Department of Tourism Region X (DOT-10), sa pakigtambayayong sa Bukidnon Police Provincial Office (Bukidnon PPO), nagpahigayon og Tourist-Oriented Police for Community Order and Protection (TOPCOP) Training niadtong Nobyembre 9–13, 2026, sa Malaybalay Air’bnb, Casisang, Malaybalay City.
Ang lima ka adlaw nga pagbansay nagtumong sa pagpalambo sa kahibalo, kahanas ug kapasidad sa mga personnel sa kapulisan aron masiguro ang kaluwasan, seguridad ug proteksyon sa mga turista ug mga hingtungdang sektor sa turismo.
Isip kabahin sa programa, gikatakdang mobisita ang mga partisipante sa nag-unang mga destinasyon sa turismo sa Malaybalay City aron personal nilang masinati ug mas mailhan ang mga atraksyon sa siyudad, lokal nga komunidad ug operasyon sa turismo. Pinaagi usab niini, mas masabtan sa mga pulis ang mga panginahanglan ug kabalaka sa mga turistang mobisita sa nagkalainlaing destinasyon.
Isip kabahin sa maong pagbansay, giimbitar isip resource speaker si Mr. Marven Jan A. Nadela, Senior Tourism Operations Officer ug Officer-in-Charge sa Malaybalay City Tourism Office.
Ang iyang pag-apil nakahatag og bililhong kahibalo sa mga personnel sa kapulisan kabahin sa industriya sa turismo sa siyudad, mga lokal nga programa sa turismo, pagpalambo sa mga destinasyon ug ang importante nga papel sa kapulisan sa pagmugna og luwas ug maabi-abihong palibot alang sa mga bisita.
Gipasiugda sa maong inisyatiba ang kamahinungdanon sa panagtambayayong tali sa sektor sa turismo ug kapulisan sa pagpalambo sa responsableng turismo ug pagmintinar sa kalinaw ug kahusay sa mga destinasyon sa turismo.
Pinaagi niining kalihokan sa pagpalambo sa kapasidad, gilauman nga mas mahimong tourism-oriented ug mas responsive sa mga panginahanglan sa mga bisita ang mga personnel sa kapulisan, samtang gipalig-on usab ang ilang papel isip mga kaabag sa pagpalambo sa turismo.
Giila sa Malaybalay City Tourism Office ang kamahinungdanon sa mga programa sama sa TOPCOP sa pagpalambo sa ilang paningkamot nga mahimong luwas, segurado ug malungtarong destinasyon sa turismo ang siyudad, aron ang matag bisita makasinati sa Malaybalay City nga may pagsalig ug kalinaw sa hunahuna.
Report: Jiany Bon B. Bagiohan – Tourism NADA