NAKASULOD sa shortlist ang City Government of Butuan pinaagi sa City Agriculture and Veterinary Department (CAVD) alang sa 51st National Gawad SAKA Awards, usa ka prestihiyosong pasidungog sa sektor sa agrikultura sa nasud.
Lima (5) ka mga siyudad gikan sa nagkalain-laing bahin sa Pilipinas ang napili isip finalists, ug apil niini ang Butuan City.
Gipahigayon ang field validation ug evaluation sa mga programa sa agrikultura ug maritime sa siyudad pinaagi sa mga opisyal gikan sa Department of Agriculture – Head Office. Gisusi nila ang kaepektibo sa mga programa ug ang konkretong benepisyo niini sa mga mag-uuma ug mangingisda, lakip na ang ilang kita, produksyon, ug kapasidad sa pagpadayon sa ilang mga organisasyon bisan pa sa mga kalamidad ug krisis.
Gitan-aw usab ang implementasyon sa mga programa sa lokal nga lebel ug ang mga inobatibong pamaagi nga nakatabang sa pagpauswag sa panginabuhi sa mga benepisyaryo.
Sumala kang CAVD Head Engr. Pierre Anthony D. Joven, ang maong pagkilala nagpamatuod sa kaepektibo sa mga programa sa siyudad ug magpadayon sa pagpalig-on sa sektor sa agrikultura ug maritime sa Butuan City.
Source: Butuan PIO