Gibatikos sa Mayor ning dakbayan ang PrimeWater gumikan sa padayon nga pagkapakyas niini sa sistema sa serbisyo sa panubig sa Malaybalay City. Matud ni Atty. Jay Warren Pabillaran, mayor sa ning dakbayan nga igo ang suplay sa tubig apan ang dako nga problema anaa sa distribution line nga dili mahimo sa Primewater.
Bisan pa sa mga pasalig sa PrimeWater nga tumanon ang ilang mga obligasyon, dismayado gihapon si Mayor Pabillaran tungod sa kakulang sa konkretong aksyon ug sa padayon nga pagpaabot sa sertipikasyon gikan sa Philippine Competition Commission alang sa pagbaligya sa maong kompanya ngadto sa bag-ong tag-iya.
Gibutyag usab sa Mayor nga bisan ang Water District wala nay mahimo sa pagkakaron sanglit hingpit na kining nasurender ngadto sa PrimeWater pinaagi sa ilang joint venture agreement.
Subay niini, gipadayag ni Engr. Nolito S. Binahon, General Manager sa Malaybalay City Water District, nga padayon nga operasyon sa PrimeWater, apan kasamatangan na ang pagproseso sa pre-termination sa kontrata aron hingpit nang matapos ang Joint Venture Agreement tali sa MCWD ug Primewater.
Matud niini gipaabot na lamang ang pormal nga pakig-istorya tali sa duha ka kampo alang sa husto nga pag-turnover sa mga pasilidad o ang pagsumite sa maong isyu ngadto sa arbitration.
Source: Bombo Radyo Malaybalay