ZAMBOANGA CITY — Gisaulog karong adlawa, Abril 26, ang “Dia de Mam Caling” isip paghandum sa ika-105 nga anibersaryo sa pagkatawo ni Maria Clara “Mam Caling” Lorenzo Lobregat, ang unang babayeng mayor sa siyudad.
Ang kalihokan magsugod sa usa ka misa nga pagahimoon sa Holy Trinity Parish Church sa Pasonanca alas-4 sa hapon, nga pagasundan sa usa ka commemorative program sa Jardin Maria Clara alas-5:30 sa hapon. Kabahin sa programa ang paghatag sa MCLL Awards isip pagpasidungog sa mga indibidwal ug organisasyon nga nagpakita og talagsaong serbisyo sa komunidad.
Si Mam Caling Lobregat nagserbisyo isip mayor sa Zamboanga City gikan Hulyo 1, 1998 hangtod sa iyang pagpanaw niadtong Enero 2, 2004. Sa wala pa kini, napili siya isip Constitutional Convention delegate niadtong 1971 ug nagsilbi usab og tulo ka termino isip miyembro sa House of Representatives sugod 1987, ug napili pag-usab niadtong 1992 ug 1995. Human sa iyang termino sa Kongreso, midaog siya isip mayor niadtong 1998.
Natawo si Mam Caling niadtong Abril 26, 1921.
Ang “Dia de Mam Caling” usa ka tinuig nga kalihokan sa City Government, pinasikad sa Ordinance 278 nga gipasar niadtong 2006, isip pagpasidungog sa iyang dako nga kontribusyon sa kalamboan sa Zamboanga City.
Source: CMO-PIO