Malampusong gilunsad sa Kadiwa Trading Post, Barangay 9 ang unang hugna sa “P20 Rice Program (Benteng Bigas, Meron Na!)”, usa ka subsidized nga inisyatiba nga nagtugot sa mga benepisyaryo sa pagpalit og usa ka kilo sa bugas sa kantidad nga ₱20 lamang adtong Abril 29, 2026 sa siyudad sa Malaybalay City, Bukidnon.
Tumong sa programa ang pagtabang sa mga kabus ug bulnerable nga sektor pinaagi sa paghatag og barato ug accessible nga pagkaon.
Ang maong programa gipondohan sa National Government pinaagi sa Department of Agriculture ug Food Terminal Incorporated, samtang ang Department of Labor and Employment (DOLE) pinaagi sa TUPAD maoy mitabang sa labor component sa implementasyon.
Gipangunahan ang kalihokan sa City Agriculture Office isip Kadiwa Technical Working Group Co-Chairperson, uban ang City Economic Enterprises Development and Management Office isip Kadiwa Focal, kauban ang City Mayor’s Office – Business Permits and Licensing Division (CMO-BPLD), Department of Social Welfare and Development, Persons with Disability Affairs Office (PDAO), ug Office for Senior Citizens Affairs (OSCA).
Mokabat sa 1,500 ka indibidwal ang nakabenepisyo, lakip ang mga drayber sa motorela, solo parents, senior citizens, 4Ps beneficiaries, Persons with Disabilities (PWDs), ug mga mag-uuma.
Tungod sa limitadong alokasyon nga 15,000 kilos sa unang batch, giprioridad ang hustong pagpili sa mga benepisyaryo aron masiguro nga makaabot ang programa sa labing nanginahanglan.
Ang mga kwalipikadong indibidwal giila ug gi-rehistro pinaagi sa nagkalain-laing opisina aron masiguro ang hapsay ug patas nga pag-apod-apod.
Lakip sa giprioritize sa City Agriculture Office alang sa unang batch ang 250 ka mag-uuma sa mais ug high value commercial crops gikan sa kapin 16,000 ka rehistradong mag-uuma sa siyudad.
Kini sila adunay uma nga 0.5 ektarya paubos, walay laing tinubdan sa kita, ug rehistrado sa Registry System for Basic Sectors in Agriculture (RSBSA).
Gikuha sila gikan sa mga barangay nga duol sa venue sama sa Patpat, Kalasungay, Sumpong, Can-ayan, Casisang, San Jose, Laguitas, ug Barangay 10 aron mas mapadali ang distribusyon.
Gipasalamatan usab ang suporta ni City Mayor Jay Warren R. Pabillaran nga naghatag og pondo alang sa pagpalit sa mga eco-bags nga gigamit sa paghatag sa bugas ngadto sa mga benepisyaryo.
Sa iyang pahayag, si City Agriculturist Engr. Richard B. Leono mipasabot nga ang bugas nga gipanghatag gikan sa National Food Authority (NFA) ug lokal nga produksyon, nga adunay edad nga 0–3 ka bulan gikan sa pag-ani sa palay.
Gipasiugda usab niya nga ang listahan sa mga benepisyaryo dili magbalik-balik aron mas daghan pa ang makabenepisyo sa sunod nga mga batch.
Sumala pa kaniya, ang mga sakop sa vulnerable sector mahimong makapalit og hangtod 30 kilo nga bugas matag bulan, nga limitado sa 10 kilo matag transaksyon.
Samtang ang mga mag-uuma mahimong makapalit og hangtod 50 kilo sulod sa lima ka bulan.
Sa laing bahin, gipadayag ni City Councilor Alan Ryann O. Legaspi ang iyang kalipay sa pagpatuman sa programa, ilabi na nga kini naigo sa panahon sa krisis ug epekto sa taas nga init.
Naglaum usab siya nga magpadayon ang maong inisyatiba aron mas daghan pa ang matabangan sa umaabot.
Ang “P20 Rice Program” usa ka konkretong lakang sa lokal nga panggamhanan aron mapagaan ang palas-anon sa mga pamilya ug mapalambo ang food accessibility ug social welfare sa komunidad.
Ni: Gecel Quinquiño-Ocon, City Agri-NADA