Mibalik na ang pag-agos sa tubig ngadto sa mga umahan sa Lutayan, Sultan Kudarat human pormal nang gi-abrihan ang Antong Diversion Dam System mahuman ang kapin P1-bilyon nga rehabilitasyon niini.
Ang proyekto nga gipatuman sa National Irrigation Administration usa sa mga importanteng imprastraktura nga gisuportahan sa nasudnong gobyerno aron mapasig-uli ang serbisyo sa irigasyon sa sulod 3,000 ka ektarya nga agricultural land.
Lakip sa gi-upgrade nga sistema ang bag-ong diversion dam, mga protection dikes, irrigation canals, ug access roads aron mas mapalambo ang paghatod sa tubig ngadto sa mga umahan.
Matod ni Engr. Diosdado Rosales, operational na karon ang irrigation system ug gilauman nga magsugod na ang irigasyon karong bulan sa Mayo.
Gipasabot usab ni Datu Pax Ali Mangudadatu nga dakong tabang ang proyekto alang sa food security ug climate resilience sa probinsya, ilabina sa pagtabang sa mga mag-uuma nga mapadayon ang ilang produksyon bisan pa sa epekto sa El Niño ug grabeng kondisyon sa panahon.
Alang sa mga mag-uuma ug lokal nga opisyal, ang rehabilitasyon sa Antong Dam naghatag og bag-ong paglaum sa mga komunidad nga dugayng nakasinati og kakulang sa kasaligan nga irigasyon.