Usa ka mahinungdanong kalihokan ang nasaksihan sa mga Tagumenyo human opisyal nga gipahigayon sa Lokal nga Panggamhanan sa Tagum ang unang Wheelchair Pickleball Tournament, isip kabahin sa Tagum City Paralympics 2026, nga gipahitabo karong adlawa, Hulyo 22, 2026 sa City Homes Gymnasium, Tagum City, Davao del Norte.
Gitambongan kini sa mga miyembro sa PWD Federation of Tagum City, ilabina sa mga adunay orthopedic disability, nga nagpakita sa ilang abilidad, disiplina, ug determinasyon sa pagdula.
Ang pickleball usa na sa mga labing popular nga dula sa kalibotan. Gidula kini gamit ang paddle ug gaan nga bola, samtang sa wheelchair pickleball, gitugotan ang bola nga makabounce og duha ka higayon sa dili pa kini ibalik.
Sumala ni PWD Federation President Herman Salvador, ang Wheelchair Pickleball usa ka bag-ong kalihokan alang sa PWD community sa siyudad. Matud pa niya, kini nagpamatuod nga walay babag ang pisikal nga kahimtang aron mapakita sa mga Persons with Disabilities ang ilang talento ug kahanas sa sports.
Ang maong kalihokan gipasiugdahan sa Lokal nga Panggamhanan sa Tagum uban sa pakigtambayayong sa City Social Welfare and Development Office (CSWDO) ug Persons with Disability Affairs Office (PDAO), isip kabahin sa pagsaulog sa National Disability Rights Week.
Gawas sa Wheelchair Pickleball, gipahigayon usab ang kompetisyon sa Chess, Table Tennis, ug Wheelchair Basketball, isip kabahin sa padayon nga paningkamot sa Lokal nga Panggamhanan sa Tagum sa paghatag og patas nga oportunidad sa mga Persons with Disabilities pinaagi sa sports.