Aron madapayon ug magpabiling Business-as-usual ang mga negosyo panahon sa mga kalamidad nga posibling mahitabo sa Tagum, gipalig-on ang kahibalo sa mga business owners sa siyudad pinaagi sa pagpahigayon sa MSMEs Disaster Preparedness and Business Continuity Planning Seminar sa AVR 4, Tagum City Hall, Davao del Norte karong adlawa, Hulyo 21, 2026.
Gisalmutan kini sa 50 ka business owners ug staff gikan sa nagkalain-laing MSME business establishments sa siyudad, diin mas gipalaluman pa ang ilang pagsabot sa kamahinungdanon sa disaster preparedness.
Kabahin sa maong kalihukan ang pagpresentar sa matag partisipante sa ilang Business Continuity Plan (BCP), diin ilang gipakita ang mga plano nga ilang ipatuman aron mapadayon ang operasyon sa ilang negosyo kung adunay muabot nga kalamidad sa dakbayan.
Ang maong pagbansay kabahin sa National Disaster Resilience Month Observance 2026, diin gipalig-on sa Lokal nga Panggamhanan sa Tagum, pinaagi sa City Disaster Risk Reduction and Management Office (CDRRMO), uban sa pakig-alayon sa Department of Trade and Industry (DTI) Davao del Norte, Tagum City Business and Incentive Center (TCBIC), ug Tagum Hub for Research, Innovation, Ventures, and Entrepreneurship, ang suporta niini sa lokal nga mga negosyo pinaagi sa paghatag og kahibalo ug mga pamaagi aron mahimong mas andam ang MSMEs panahon sa kalamidad.