Malampusong gipahigayon sa Department of Migrant Workers (DMW) ang “Regional Caravan on Anti-Illegal Recruitment and Trafficking in Persons” alang sa mga Barangay Local Government Units sa Valencia City, Bukidnon niadtong Mayo 26, 2026 sa Jocel’s Garden and Suites.
Tumong sa maong kalihokan nga mapalig-on ang kahibalo sa mga barangay officials ug komunidad batok sa illegal recruitment ug human trafficking, ilabina karon nga daghan gihapon ang nabiktima sa iligal nga pagpangrekrut alang sa trabaho sa gawas sa nasud.
Nahimong mamumulong si Atty. Francis Andrew O. Paduganan sa DMW diin iyang giabi-abi ang mga partisipante. Gipaabot usab nila Mayor Amie Galario ug Vice Mayor Grezeil Galario Fernandez ang ilang hugot nga suporta sa mga programa nga naghatag proteksyon ug hustong impormasyon alang sa mga mangitaay og trabaho, ilabina sa mga nagplano nga mangapply sa ubang nasud, samtang gipasiugda ang importansya sa pagpanalipod sa katawhan batok sa illegal recruiters ug mga sindikato sa human trafficking.
Atol sa caravan, gihisgutan sa mga resource speakers ang DMW mandate ug MWPD programs, mga balaod ug regulasyon sa DMW, lecture kabahin sa Anti-Illegal Recruitment and Trafficking in Persons (AIRTIP), ug ang mga importanteng probisyon sa R.A. 9208 o Anti-Trafficking in Persons Act nga gi-amendar pinaagi sa R.A. 10364.
Nagpahigayon usab og open forum ug simulation activity aron mas masabtan sa mga partisipante ang hustong proseso sa legal nga recruitment ug paglikay sa mga modus sa illegal recruiters.
Ang maong kalihokan nahimong malampuson pinaagi sa koordinasyon sa Public Employment Service Office (PESO) sa Valencia City isip kabahin sa padayong kampanya sa lokal nga panggamhanan batok sa illegal recruitment ug human trafficking.
PIAD | Evelyn Calderon
Photos: Jessa Heroche & Mhai Alojepan