Malampusong gipahigayon ang blessing sa pasilidad sa Regional Yarn Production and Innovation Center (RYPIC) sa Kabacan, Cotabato niadtong Hunyo 5, 2026.
Ang maong proyekto, ubos sa liderato ni Pangulong Ferdinand R. Marcos Jr. ug sa pakigtambayayong ni Department of Science and Technology (DOST) Secretary Dr. Renato U. Solidum Jr., gilauman nga makatabang sa pagpalambo sa industriya sa tela sa nasud.
Nakatabang sa pagpatuman sa maong proyekto sa Rehiyon 12 ang opisina ni Field Office-12 Regional Director Engr. Sammy P. Malawan ug ang DOST-Philippine Textile Research Institute (PTRI), nga padayon nga nagpalambo sa inobasyon pinaagi sa paggamit sa modernong teknolohiya sa pagproseso sa mga natural nga hibla sama sa abaka, saging, pinya, bulak, ug kawayan.
Dako usab ang kalipay ug pasalamat ni Regional Development Council (RDC) 12 Chairperson ug Cotabato Governor Emmylou “Lala” J. Taliño-Mendoza sa proyekto nga gihatag sa DOST alang sa SOCCSKSARGEN. Gilauman nga kini makahatag og daghang oportunidad sa panginabuhian ug negosyo, ug makapasiugda sa mga produktong hinimo sa mga Pilipino.
Kabahin sa kalihokan ang unveiling sa RYPIC Marker nga nagsimbolo sa opisyal nga pagbukas sa sentro, ingon man ang facility tour nga naghatag higayon sa mga bisita nga personal nga makita ang mga kagamitan ug masabtan ang teknolohiya ug mga serbisyong ihatag sa RYPIC.
Gitambongan ug gisaksihan ang maong kalihokan nila DOST Undersecretary for Regional Operations Engr. Sancho A. Mabborang, DOST PTRI Director IV Dr. Julius L. Leaño Jr., USM President Dr. Jonald L. Pimentel, Sultan Kudarat State University President Dr. Samson L. Molao, Kabacan Mayor Evangeline Pascua-Guzman, ug uban pang mga bisita.