Sa taliwala sa mga kadaot nga nahibilin human sa kusog nga linog nga miigo sa pipila ka mga komunidad sa Glan, Sarangani, nagpadayon ang Regional Mobile Force Battalion 12 (RMFB 12) sa ilang misyon sa pagtabang sa mga naapektuhang pamilya pinaagi sa rehabilitasyon ug pag-ayo sa mga panimalay.
Ubos sa pagpanguna ni PSSg Rustato T. Pancho, Team Leader, ug sa pagdumala ni Police Colonel Argel N. Ancheta, Force Commander sa RMFB 12, gipahigayon sa mga personnel sa batalyon ang pag-layout sa mga balay nga nadaot sa linog sa Riverside, Barangay Poblacion.
Ang kalihokan naabot na sa ikatulong adlaw sa padayon nga repair, construction, ug rehabilitation efforts alang sa mga pamilyang naapektuhan sa kalamidad.
Bisan og mibalik na sa normal ang kahimtang sa maong lugar, nagpabilin nga bug-at ang gibati sa mga residente nga nawad-an o nadaotan sa ilang mga panimalay.
Apan sa matag sukod, marka, ug preparasyon nga gihimo sa mga personnel sa RMFB 12, hinay-hinay usab nga natukod pag-usab ang paglaum sa komunidad.
Labaw pa sa teknikal nga buluhaton, ang presensya sa kapulisan nagpakita sa ilang tinuod nga pagpakabana ug pakighiusa sa katawhan nga naningkamot sa pagbangon gikan sa kalisod nga gidala sa linog.
“Sa bawat pinsalang dulot ng sakuna, nariyan ang PNP hindi lamang para tumugon, kundi para damayan. Sama-sama tayong babangon at muling magtatayo ng mas matatag na komunidad.”matud ni Police Brigadier General Alan B. Manibog, Acting Regional Director sa PRO 12.
Pinaagi sa padayon nga rehabilitasyon ug serbisyo sa komunidad, gipamatud-an sa RMFB 12 nga ang ilang misyon dili lamang kutob sa pagmintinar sa kalinaw ug kahapsay, kondili usab sa pagtabang sa katawhan nga makabangon ug makasugod pag-usab human sa mga pagsulay nga gidala sa kalamidad.