Naghatag og ₱40 milyon nga pinansyal nga tabang gikan sa National Government pinaagi kang Presidente Ferdinand R. Marcos Jr., ang Probinsya sa South Cotabato aron suportahan ang scholarship program ug mga prayoridad nga proyekto sa 200 ka barangay sa probinsya.
Matud pa sa Pangulo, matag barangay makadawat og ₱200,000 diin ₱100,000 niini ilaan alang sa scholarship assistance sa lima ka estudyante, samtang ang nahibilin nga pondo gamiton alang sa mga proyekto ug kalamboan sa komunidad.
Nagpasalamat usab si South Cotabato Governor Reynaldo S. Tamayo Jr., kang Presidente Marcos Jr., tungod sa padayon nga suporta sa National Government ngadto sa lokal nga panggamhanan.
Samtang, malampuson ug malinawon ang pagbisita sa Pangulo sa South Cotabato alang sa programang “Bawat Bayan Makikinabang: South Cotabato” pinaagi sa hugot nga seguridad nga gipahigayon sa South Cotabato Police Provincial Office ubos sa pagpangulo ni Police Colonel Samuel T. Cadungon.
Pinaagi sa epektibong koordinasyon ug estratehikong pagdeploy sa kapulisan ug mga partner agencies, nasiguro ang kaluwasan sa Pangulo, mga opisyal sa gobyerno, ug sa publiko atol sa maong kalihokan.