Milampus ang Police Regional Office 10 (PRO10) sa pagsanta sa gi-ingong smuggled nga sigarilyo nga nagkantidad og P1.12 milyon pasado alas-12:55 sa udto sa National Highway, Purok 5, Sitio Mapalad, Barangay Dalipuga, Iligan City niadtong Agosto 9, 2026.
Ang operasyon gihimo sa mga personahe sa Iligan City Police Office (ICPO) Intelligence Unit–City Special Operations Unit (CIU-CSOU) uban sa Regional Intelligence Division 10 (RID 10) Resident Agent–Iligan City ug Task Force Iligan.
Nasakmit ang usa ka berde nga Isuzu Forward Aluminum Van nga giingong narehistro sa usa ka indibidwal gikan sa Upper Calarian, Zamboanga City.
Sa inspeksyon, nakita sa mga pulis ang daghang kahon sa “GREENHILLS” brand nga sigarilyo sulod sa sakyanan.
Lakip sa nasikop ang 26-anyos nga drayber, 21-anyos nga pasahero, ug 20-anyos nga truckman, tanan lalaki ug residente sa San Francisco, Agusan del Sur.
Giingon nga gikan pa sa Zamboanga City ang mga sigarilyo ug gidala sa Lanao del Norte, diin gikuha sa tulo ang sakyanan aron dad-on sa Agusan del Sur.
Gikompiskar ang 1,400 ka reams sa “GREENHILLS” brand nga sigarilyo nga nagkantidad sa P1,120,000 ka pesos uban sa van.
Wala makapakita ang mga sakop ang dokumento sa importation, Bureau of Customs clearance, tax stamps, o ebidensya sa bayad sa customs duties ug internal revenue taxes, hinungdan nga gi-confiscate kini isip smuggled goods.
Ang mga dinakpan pasakahan sa kalapasan sa Republic Act No. 10863 o Customs Modernization and Tariff Act ug ubang probisyon sa National Internal Revenue Code.
Ang tanang nakumpiskar nga items iturn-over sa Bureau of Customs (BOC) alang sa hustong dokumentasyon, pag-amping, ug angay nga proseso.
Hisayran nga ang tolo ka nasikop gipagawas temporaryo samtang naghulat sa desisyon ug dugang nga proseso sa BOC.
Source: Bombo Radyo CDO