Malampusong gipahigayon ang PNP Special Electoral Board (SEB) Training sa South Cotabato Police Provincial Office sa pakigtambayayong sa COMELEC Region XII, niadtong Agosto 20, 2026 sa South Cotabato PPO Covered Court, Barangay Morales, Koronadal City.
Gipangulohan ang closing ceremony ni Atty. Katherine A. Maneja-Panda, isip representante ni Atty. Jose M. Villanueva, Assistant Regional Election Director sa COMELEC Region XII. Sa iyang mensahe, iyang gipasiugda ang kamahinungdanon sa lig-on nga relasyon ug suod nga koordinasyon tali sa COMELEC ug PNP aron mapanalipdan ang integridad, seguridad, ug hapsay nga pagdumala sa proseso sa eleksyon.
Gipahayag usab niya ang pagpasalamat sa COMELEC ngadto sa PNP tungod sa padayon nga dedikasyon ug importante nga suporta, ilabi na sa pagpangandam alang sa umaabot nga BARMM Parliamentary Elections.
Mitambong usab sa seremonya sila si PLTCOL Marifel A. Maganto, Deputy Provincial Director for Administration; PLTCOL Virlen P. Pampolina, Deputy Provincial Director for Operations; ug PMAJ Jerald Gervacio, Chief sa ETS.
Ang pagbansay gitambongan sa mga piniling personnel sa PNP gikan sa SCPPO, Sultan Kudarat Police Provincial Office, Cotabato Police Provincial Office, ug Regional Mobile Force Battalion XII (RMFB XII).
Tumong niini nga hatagan og igong kahibalo ug pagsabot sa ilang mga katungdanan ug responsibilidad isip mga miyembro sa Special Electoral Board.
Matud sa South Cotabato PPO, ang malampusong pagkompleto sa training nakapalig-on pa sa kaandam sa mga kapulisan sa pagtuman sa ilang mga katungdanan sa eleksyon nga adunay propesyonalismo, pagkapatas, integridad, ug pagmatinud-anon sa serbisyo publiko.
Gipalig-on usab sa maong programa ang padayong panagtinabangay sa PNP ug COMELEC aron masiguro ang luwas, hapsay, malinawon, ug kasaligan nga pagpahigayon sa mga umaabot nga eleksyon.