Ang pagpahigayon sa libreng eye screening sa mga Grade 1 student sa nagkadaiyang tulunghaan sa Tagum, nga adunay kalabutan sa pag-obserbar sa World Sight Saving Month karong bulana sa Agosto.
Kini kabahin sa Project Caring for Others – Pediatric Eye Care Program, nga gipangunahan sa City Health Office sa Lokal nga Panggamhanan sa Tagum.
Tumong sa maong inisyatibo ang early detection alang sa problema sa mata sa mga bata ug pagsiguro nga mahatagan kini og saktong prescription glasses kon gikinahanglan.
Personal nga mitambong sa Florentino Catalan Elementary School, ang buena manong tulunghaan nga gipahigayon ang eye screening, si Tagum City Council of Women Foundation Inc. President Alma L. Uy, nga mihatag og mensahe mahitungod sa importansya sa klaro ug maayong panan-aw, ilabina sa pag-eskwela ug sa pang-adlaw-adlaw nga pamuyo sa mga bata.
Nahimong posible ang maong inisyatibo pinaagi sa panaghiusa sa LGU-Tagum, Tagum City Council of Women Foundation Inc., Optometric Association of the Philippines – Tagum Optometric Society, Department of Education – Tagum City Division, PhilHealth, ug Rotary Club of Tagum Golden L.A.C.E.S.