Gipangunahan ni PBGEN Marcial Mariano P. Magistrado IV, Regional Director sa Police Regional Office (PRO) 13, ang usa ka importanteng dayalogo uban sa mga opisyal sa munisipyo sa Magallanes, Agusan del Norte, nga gipangulohan ni Mayor Cesar “Bubu” Cumba Jr., kauban ang mga school principal ug faculty members sa lugar.
Tumong sa miting nga palig-onon ang mga lakang alang sa seguridad ug kaluwasan sa 17 ka mga eskwelahan sa munisipyo, ilabina human sa bag-uhay nga makasusubo nga insidente sa pagpamusil sa usa ka eskwelahan sa Zamboanga City.
Atol sa dayalogo, gipasiugda ni PBGEN Magistrado IV ang kamahinungdanon sa proactive security measures, mas taas nga pagbantay, ug suod nga koordinasyon tali sa kapulisan, lokal nga pangagamhanan, ug sektor sa edukasyon aron masiguro ang kaluwasan sa mga estudyante, magtutudlo, ug school personnel.
Gipasiugda usab sa Regional Director ang panginahanglan nga mapalambo ang police visibility palibot sa mga eskwelahan, mapaayo ang komunikasyon ug reporting mechanisms, ug dali nga matubag ang mga posibleng hulga sa seguridad.
Ang mga opisyal sa munisipyo ug mga administrador sa eskwelahan mipakigbahin usab sa ilang mga obserbasyon ug rekomendasyon, nga nagpasiugda sa importansya sa hiniusang pamaagi ug panagtambayayong aron mapadayon ang luwas nga palibot sa pagkat-on.
Giseguro ni PBGEN Magistrado IV ang mga partisipante sa padayon nga pasalig sa PRO13 sa pakigtambayayong sa mga local government unit ug school authorities aron mapalig-on ang seguridad, mapugngan ang mga hulga, ug mapadayon ang paspas ug epektibong presensya sa kapulisan sa mga komunidad.
Ang maong dayalogo nagpakita sa proactive nga paningkamot sa PRO13 sa pagpanalipod sa mga eskwelahan ug pagpalig-on sa panagtambayayong tali sa nagkalain-laing stakeholder alang sa mas luwas nga palibot sa pagkat-on.