Pormal nga giturn-over sa GCash (G-Xchange, Inc.) ngadto sa Lokal nga Kagamhanan sa General Santos City ang 15 ka tents ug usa ka signage isip suporta sa mga programa ug serbisyo nga gihatag sa siyudad alang sa mga pamilyang Heneral.
Personal nga midawat sa mga donasyon si Executive Assistant to the Mayor Atty. Nikki Catolico, nga nagrepresentar kang City Mayor Lorelie Geronimo Pacquiao.
Matud ni Mayor Pacquiao, dakong tabang ang mga kagamitan nga gihatag sa pagpatuman sa mga kalihokan ug serbisyo sa lokal nga kagamhanan, ilabina sa mga programa nga direktang gidala ngadto sa mga komunidad.
Nagpahayag usab si Mayor Pacquiao sa iyang kinasingkasing nga pagpasalamat sa GCash tungod sa ilang suporta ug pakigtambayayong sa LGU-General Santos. Matud pa niya, ang mga sama niini nga inisyatiba gikan sa mga pribadong institusyon makatabang sa pagpalig-on sa mga serbisyo nga gihatag sa kagamhanan sa siyudad ngadto sa mga residente.
Padayon usab nga gipalambo sa administrasyon ni Mayor Pacquiao ang pakigtambayayong sa nagkalain-laing sektor ug pribadong organisasyon aron mas mapalig-on ug mapalapad pa ang mga serbisyo nga gihatag alang sa mga Heneral.