Dali nga nabawi sa mga pulis ang usa ka gikawat nga motorsiklo sa wala pa molapas og usa ka oras human sa pagreport sa insidente tungod sa paspas nga serbisyo publiko sa miyembro sa San Fernando Municipal Police Station karung adlawng Miyerkules, Setyembre 30, 2026 sa San Fernando, Bukidnon.
Nahibal-an nga mitaho sa maong istasyon ang usa ka 43 anyos nga babae, biktima tungod nga gikawat ang iyang Honda XRM nga nawala kaganinang 3:00 sa kaadlawon.
Daling naghimo ug pagronda ug namatikdan ang usa ka 18-anyos nga lalaki nga nagduso sa motorsiklo nga ni-match sa na-carnap nga motor sa Barangay Halapitan ug wala kini maipakita nga legal nga dokumento nga makapamatuod nga iyaha ang maong motor.
Gidayig sa katawhan ang paspas nga responde sa San Fernando PNP tungod kay nabalik ang maong motor sa tag-iya niini ug magsagubang ang maong suspek sa tukmang kaso.