Usa ka dakong garbo para sa Siyudad sa Tagum ang nasakmit nga kadaugan human kini opisyal nga gi-ila isip Champion sa Retirement Haven category sa prestihiyosong The Manila Times’ Philippine Model Cities and Municipalities Award 2026.
Ang maong pasidungog personal nga gidawat ni Councilor Arthur “Uloy” Ong, nga nagrepresenta sa Lokal nga Panggamhanan sa Tagum ubos sa pamunoan ni Mayor Rey T. Uy, atol sa awarding ceremony nga gipahigayon sa Manila Hotel, kaniadtong Septyembre 24, 2026.
Makitang kanunay ang pagpaningkamot sa Lokal nga Panggamhanan sa pagmugna og programa ug mga pasilidad nga naghata’g pagtagad sa mga elderly.
Usa niini ang Lakbay El Anciano, nga naghatag og higayon sa mga lolo ug lola nga magsuroy suroy ug maglingaw lingaw kauban ang ilang kapwa senior citizen.
Mas gipalapdan usab sa Lokal nga Panggamhanan ang pag-atiman pinaagi sa pagmugna sa Fe Misa Ayala Senior’s Park, nga nakatagana sa mga senior citizen aron mamahimo aktibo kauban ang ilang mga kapamilya.
Dugang pa niini, anaa usab ang mga inisyatiba sama sa paggahin og cash incentives alang sa mga Centenarian, pagpatuman sa Project Apo Ko, paghatag og livelihood training and support, ug ang padayong pagpang-apud-apod sa mga Assistive Device.
Pinaagi niining mga programa, mabati nga ang Tagum, labaw ang pagpangga sa atong mga lolo ug lola nga adunay dakong kontribusyon sa pagpalambo sa atong siyudad.
Mahinumdoman nga kaniadtong miaging tuig 2025, gipasidunggan usab ang Tagum isip 2nd Runner-up alang sa Business Friendly Award ug 3rd Runner-up alang sa Wealth Center Award sa The Manila Times.
Kini nga kalampusan nagpakita lamang nga ang Tagum dili ra usa ka maayong dapit alang sa negosyo ug turismo, kun dili usa usab ka madasigon, hapsay, ug luwas nga dapit nga angay puy-an ug kapahulayan sa mga retirees.
Pinaagi niining bag-ong pag-ila, ang Lokal nga Panggamhanan sa Tagum magpadayon ug dili mohunong sa pagmugna og mga mahinungdanong programa, maayong pasilidad, ug mga serbisyo nga mas magpataas pa sa kalidad sa kinabuhi sa matag Tagumenyo.