Nasikop ang usa ka driver ug ang iyang pasahero human nasakmit sa mga awtoridad ang gibanabanang P1.08 milyon nga kantidad sa gitoohang puslit mga yosi atol sa checkpoint operation sa Purok 1, Barangay Bansarvil 1, Kapatagan, Lanao del Norte niadtong sayo sa kabuntagon adtong Martes, Setyembre 29, 2026.
Gi-ila ang mga suspek nga sina alyas “Mohammed,” 31 anyos, minyo, ug ang iyang pasahero nga si alyas “Yasser,” 19 anyos nga mga lumulopyo sa Sultan Naga Dimaporo, Lanao del Norte.
Nasayran nga gipahunong sa mga personnel sa 2nd Lanao del Norte Provincial Mobile Force Company ang usa ka pula ug puti nga van nga adunay marka nga “Patient Transport Vehicle.”
Apan imbis pasyente ang sakay, nakit-an sa sulod sa sakyanan ang 22 ka master case sa New Far Red nga sigarilyo ug lima ka master case sa New Far White nga sigarilyo.
“This operation shows that our checkpoints remain effective and our personnel are alert. No vehicle-regardless of its purpose-should be used to transport illegal goods. We will continue to enforce the law and protect our communities from smuggling.” matod pa ni PBGEN Nestor C Babagay, Regional Director sa Police Regional Office 10.