Dakong garbo sa Siyudad sa Tagum nga gihatagan og pasidungog sa Philippine Statistics Authority (PSA) ang Office of the City Civil Registrar sa siyudad isip 1st Place-2025 Outstanding Local Civil Registry sa nasud ubos sa Super Extra Large Category, lakip ang Circle of Excellence Award isip pag-ila sa makanunayon nga pagkasulod sa Top 10 sulod sa lima ka tuig.
Ang maong mga pasidungog gihatag atol sa 5th National Convention on Civil Registration ang Vital Statistics (NCCRVS) nga gipahigayon kaniadtong October 7, 2026, sa PSA Headquarters, East Avenue, Diliman, Quezon City.
Gidawat ni City Civil Registrar Editha G. McCartney, alang kang City Mayor Rey T. Uy, ang maong mga award isip pag-ila sa kahusayan ug dedikasyon sa atong lokal nga opisina sa civil registration.
Kini nga kalampusan nagpakita sa padayong paningkamot sa Lokal nga Panggamhanan ubos sa liderato ni Mayor Rey T. Uy sa paghatag og episyente, epektibo, ug de-kalidad nga serbisyo sa civil registration, lakip ang pagpanalipod sa katungod sa matag Tagumenyo.
Hinaot nga kining mga pag-ila magpadayon nga inspirasyon sa atong mga kawani sa pagpalig-on sa maayong pagdumala ug matinud-anong pagserbisyo alang sa katawhang Tagumenyo.
Garbo sa atong siyudad, garbo sa matag Tagumenyo!
