Nagkatapok ang mga Barangay Employment Desk Officers (BEDO) gikan sa nagkalain-laing barangay sa siyudad kagahapon, Oktubre 27, 2026, sa CMO Conference Room alang sa gipahigayon nga Capacity Enhancement Training sa Tagum City, Davao del Norte.
Ang maong pagbansay gipangunahan sa City Public Employment Services and Capability Development Office (CPESCDO) sa Lokal nga Panggamhanan sa Tagum aron mapalambo pa ang ilang kaalam sa employment assistance ngadto sa ilang mga barangay.
Pinaagi niini, nahatagan og higayon ang mga partisepante nga mapalawum pa ang ilang pagsabot sa mga programa ug serbisyo sa panginabuhian, lakip ang pagtabang sa mga nangitag trabaho ug paghatag og saktong impormasyon kabahin sa mga oportunidad sa pagpanarbaho.
Gipalig-on sa LGU-Tagum ang papel sa mga BEDO isip kaabag sa paghatud og mga serbisyo nga mas gipaduol ug accessible alang sa Tagumenyo jobseekers.