Pahamtangan og silot ang mga motorista nga molapas sa balaod trapiko, lakip na ang pagsul-ob og dili angay o dili uyon sa gitakdang sumbanan nga helmet.
Matud ni Justino Roy B. Santonino, Traffic Operations Officer I sa Malaybalay City, ang multa sa maong paglapas ubos sa City Ordinance mokabat sa 500 pesos, samtang nagdepende sa matang sa paglapas ang katugbang nga silot ubos sa Republic Act 4136.
Lakip usab sa mga sakop sa balaod ang mga nagmaneho nga adunay student permit, basta wala makatuman sa mga gitakdang kondisyon sa pagmaneho.
Gipasidaan usab sa opisyal nga posibleng ma-impound ang mga motorsiklo ug sakyanan nga walay kompletong dokumento ug papeles.
Gumikan gapahigayon ang kapulisan og adlaw-gabii nga operasyon sa Sumpong, ilabina sa dapit sa Crossing Bypass Road, diin duha ka motorsiklo ang ilang nasikop tungod sa kakulang sa gikinahanglang dokumento.
Source: Bombo Radyo Bukidnon