Nasakmit sa Criminal Investigation and Detection Group (CIDG) ang mokabat sa 408 ka master cases sa nagkalainlaing klase sa gidudahang mga kontrabandong sigarilyo nga nagkantidad og gibanabanang P25 milyon sa operasyon sa Barangay Poblacion, Salug, Zamboanga del Norte.
Gipahigayon ang operasyon alas-6:30 sa gabii niadtong Nobyembre 5, 2026, nga gipangulohan sa CIDG Zamboanga del Norte Provincial Field Unit, kauban ang ubang yunit sa CIDG, Regional Mobile Force Battalion 9, Zamboanga del Norte Provincial Mobile Force Company, ug mga lokal nga yunit sa kapulisan.
Sumala sa CIDG, nadiskobrehan nga walay gikinahanglang graphic health warnings, tax stamps gikan sa Bureau of Internal Revenue (BIR), ug uban pang mandatory markings ug dokumento ang mga nasakmit nga produktong tabako.
Atubangon sa mga tag-iya sa maong mga kontrabando, nga nagpabiling at-large, ang mga kasong paglapas sa Republic Act 12022 o Anti-Agricultural Economic Sabotage Act, Republic Act 10643 o Graphic Health Warnings Law, ug Republic Act 10863 o Customs Modernization and Tariff Act.
Gipasiugda sa CIDG nga kabahin kini sa gipakusgang kampanya sa gobyerno batok sa dinagkong pagpupuslit sa sigarilyo ug uban pang ilegal nga patigayon nga nakaapekto sa lehitimong industriya ug ekonomiya sa nasud.
Gipaniguro usab sa CIDG nga ipadayon ang mga operasyon batok sa ilegal nga patigayon ug pagpupuslit sa mga produktong tabako sa nagkalainlaing bahin sa nasud.
Source: StarFM Cotabato