Padayon ang pagpalapad sa kahibalo ug pagpauswag sa talento sa kabatan-onan atol sa ikaduhang adlaw sa 9th Indayog sa Tagum Dance Congress, nga gipahigayon sa Herminigildo Baloyo, MD Hall Theater karong adlawa, Nobyembre 13, 2026.
Gitambongan kini sa mga estudyante gikan sa nagkadaiyang tulonghaan sa siyudad sa Tagum, nga mikabat sa 468 ka elementarya ug hayskul nga mga estudyante. Naglangkob kini sa mosunod nga mga kategorya:
102 ka estudyante sa Children’s Hip-Hop and Modern Dance
224 ka estudyante sa Junior Pop and Contemporary Dance
142 ka estudyante sa Junior Rural Folk Dance
Nagpakita kini sa nagpadayong interes ug aktibong partisipasyon sa kabatan-onan sa pagkat-on ug pagdiskobre sa nagkadaiyang matang sa sayaw.
Pinaagi sa mga programa sama sa Indayog sa Tagum Dance Congress, naghatag ang Lokal nga Panggamhanan sa Tagum og oportunidad sa mga estudyante nga mapalambo ang ilang talento ug kahanas, ingon man mapalig-on ang pagpasigarbo sa kultura sa siyudad.
Dugang pa, makatabang kini sa pag-abli og dugang nga kahigayonan sa trabaho ug panginabuhian nga ilang magamit sa umaabot.