Gipahigayon sa City Traffic and Transportation Management Office (CTTMO) ang pagpahibalo sa mga street vendors ug stall owners sa Bagontaas, Valencia City, pinaagi sa pag-apod-apod og mga notice kalabot sa pagpahawa sa ilang mga puwesto ug pagtangtang sa mga display sa daplin sa karsada dili molapas sa Nobyembre 19, 2026.
Gihimo kini pinasubay sa Ordinance No. 45-2011, nga nagdili sa pagtukod og bisan unsang estruktura ug paggamit og mobile carts ug mga sakyanan alang sa pagbaligya sa mga giila nga pampublikong lugar ug access roads, ug Ordinance No. 22-2025 o Anti-Road Obstruction and Unauthorized Reservation Ordinance.
Tumong sa maong pagpahibalo nga mapatuman ang mga ordinansa, matubag ang kahuot sa trapiko, malikayan ang pagbabag sa agianan sa mga pedestrian, ug masiguro ang kaluwasan sa tanang naggamit sa karsada.
Giawhag ang mga vendor nga mosunod sa gipahibalo nga deadline ug makig-alayon sa CTTMO alang sa dugang nga impormasyon.