Giawhag ni Executive Assistant Ma. Lourdes Casabuena, representante ni City Mayor Lorelie Geronimo-Pacquiao, ang mga miyembro sa media ug ang publiko nga mahimong aktibong tigpanalipod sa kaluwasan ug kaayohan sa mga bata, ilabi na batok sa mga kaso sa Online Sexual Abuse and Exploitation of Children (OSAEC).
Mao kini ang pangunang panawagan ni Casabuena atol sa press conference nga gihimo isip kabahin sa pagsaulog sa National Children’s Month karong tuiga nga adunay temang “Manindigan! Tumugon at Kumalinga: Sa Batang Handa, Mas Ligtas ang Bansa.”
Gipasiugda niya ang importante nga papel sa media sa pagpakaylap sa kahibalo ug paghatag og pagtagad sa mga isyu nga naghulga sa kaluwasan sa mga bata. Giawhag usab niya ang publiko nga dili lamang magpabiling tig-obserbar, kondili aktibong mobarog alang sa ilang katungod, magmabinantayon, ug molihok dayon kon adunay timailhan sa pagpang-abuso ug pagpahimulos sa mga bata.
Atol sa diskusyon, gipaambit ni City Social Welfare and Development Office (CSWDO) Department Head Genelene Vidanes, RSW, ang mga lakang sa lokal nga panggamhanan aron maseguro ang proteksiyon ug kaayohan sa kabatan-onan, lakip na ang pagpatuman sa mga kasamtangang polisiya ug programa nga nagtumong sa pagpugong sa bisan unsang matang sa pagpang-abuso.
Gihisgotan usab sa mga representante sa Women and Children Protection Desk sa General Santos City Police Office (GSCPO) ang mga lakang sa kapulisan sa pagtubag sa mga kaso nga may kalabotan sa pagpang-abuso ug pagpahimulos sa kababayen-an ug mga bata.
Samtang, gipatin-aw ni Education Program Specialist II ug Learner Rights and Protection Focal Person Anna Lizza Salvador sa Department of Education (DepEd) ang mga programa ug mekanismo sa mga eskwelahan alang sa pagpanalipod sa mga estudyante. Lakip niini ang pagpatuman sa mga polisiya alang sa proteksiyon sa mga bata ug pagpahigayon og mga seminar ug oryentasyon alang sa mga ginikanan, magtutudlo, ug uban pang kawani sa eskwelahan aron mapalapdan ang ilang kahibalo ug kapasidad sa pag-ila ug pagtubag sa posibleng mga kaso sa pagpang-abuso.
Gipasiugda usab ang importante nga papel sa Local Council for the Protection of Children (LCPC) isip mekanismo sa koordinasyon sa nagkalain-laing opisina ug sektor sa pagpalambo sa mga programa ug lakang alang sa proteksiyon sa mga bata sa siyudad.
Pinaagi sa panaghiusa ug pagtinabangay sa CSWDO, GSCPO, DepEd, ug uban pang kauban nga sektor, padayon nga gipasiugda sa lokal nga panggamhanan ang pagtukod og luwas ug mahigugmaong palibot diin mapanalipdan ang katungod sa matag bata ug mahatagan sila og kahigayonan nga motubo nga luwas ug gawasnon gikan sa bisan unsang matang sa pagpang-abuso.
(CPIO/KAG/RSC)