Dakpan ang usa ka 35-anyos nga lalaki human masakpan nga adunay gidala nga walay lisensya nga pusil sa usa ka border control checkpoint sa kapulisan sa Sitio Ticub, Barangay Pamotolon, Kalilangan, Bukidnon, takna 6:30 sa gabii niadtong Nobyembre 11, 2026.
Giila ang suspek nga si alyas “Niel,” usa ka heavy equipment technician ug residente sa Maramag, Bukidnon.
Base sa report, gipahunong sa mga personnel sa 1004th Maneuver Company sa Regional Mobile Force Battalion 10 ang motorsiklo nga gimaneho sa suspetsado tungod kay wala kini magsul-ob og helmet. Namatikdan sa mga pulis ang murag kuptanan sa pusil nga naggawas sa iyang hawak.
Sa gihimong beripikasyon, nakuha gikan kaniya ang usa ka kalibre .45 nga pistola, duha ka magazine ug tulo ka bala. Wala usab makapakita og mga dokumento nga magpamatuod nga rehistrado ang maong pusil ug awtorisado siyang magdala niini ug nagsagubang sa kasong paglapas sa Republic Act 10591 o Comprehensive Firearms and Ammunition Regulation Act.
Padayon nga palig-onon sa kapulisan ang mga checkpoint ug border security operations aron masiguro nga walay iligal nga armas nga magamit sa paghimo og krimen.