Wala nang buhay ng matagpuan ang naitalang nawawalang pulis matapos ang tatlong araw na paghahanap sa gilid ng Maradugao River, Purok 2, Panang, Wao, Lanao del Sur nito lamang Hunyo 26, 2023.
Kinilala ang biktima na si Patrolman Jeffrey Dabuco, 31 anyos, nakatalaga sa 1004th Patrol Base ng Regional Mobile Force Battalion 10, Maradugao Base, Sitio Ticub, Pamotolon, Kalilangan, Bukidnon.
Napag-alaman na ine-report mismo ni Jerry Dabuco, 28 anyos, kapatid ng biktima ang pagkawala ng bagitong pulis noong Hunyo 24, 2023 sa himpilan ng Kalilangan Municipal Police Station.
Dahil sa pagtutulungan ng mga awtoridad at LGU ay nakita ang bangkay ni Patrolman Dabuco malapit sa mga puno sa gilid ng Maradugao River at nasa decomposition stage.
Nakasuot ang biktima ng itim/pulang underwear at ang t-shirt nito ay natatabunan ang kanyang mukha.
Hustisya naman ang sigaw ng pamilya ni Patrolman Dabuco na isang padre-de-pamilya at isang responsableng ama sa kanyang dalawang anak.
Patuloy naman ang masusing imbestigasyon ng Northern Mindanao PNP upang malutas at mabigyan ng hustisya ang pagkamatay ng isang responsableng ama at alagad ng batas.