Gi-ratrat sa usa ka pulis ang kaugalingong live-in-partner niini gamit ang iyang issued firearms hinungdan sa hinanaling kamatayon ug samdan usab ang inahan sa babae sa Purok 11, Bonifacio Bataan St., Barangay Aplaya, Digos City, Davao del Sur takna 8:30 sa gabii adtong Domingo, Agosto 31, 2025.
Giila ang suspek nga 30 anyos, aktibong miyembro sa PNP ug naka-assign kini sa Hagonoy Municipal Police Station.
Giila ang biktima nga si alyas “Mel” ug residente sa maong lugar.
Samtang anaa sa balay tambalanan ang inahan sa maong babae human kini naigo sa bala gikan sa maong suspek na pulis.
Sigun sa imbestigasyon sa Digos City PNP, ni-abot sa maong puloy-unan ang maong pulis nga hubog ug kauban iyang anak nga babae.
Nag-away ang mag-live-in-partner ug sa wala damha, kalit lang gibunot niini ang iyang issued firearms ug giratratan ang maong biktima nga maoy rason sa kamatayon niini ug na samdan pud ang inahan sa babae.
Narekober sa crime scene ang 10 fired cartridge cases ug pito ka deformed nga bala.
Nagpadayon ang lalom nga imbestigasyon sa Digos City PNP para mahibal-an ang motibo sa maong pagpamusil ug ang maong pulis nag-atubang sa kasong Murder.
Nagpahinumdum usab ang mga otoridad nga dili magpadala sa init sa ulo ug kung naay problema, estoryahan kini sa husto nga pama-agi ug dili ipa-agi sa pag-inom kay kini makahatag ug laing problema nga hinulsulan nato sa ulahi.
