Ni-surrender ang tulo ka miyembro sa New People’s Army (NPA) sa mga otoridad atol sa Joint Peace and Reintegration Ceremony nga gipahigayon sa lungsod sa Cabanglasan, Bukidnon adtong Lunes, Oktubre 27, 2025.
Nahibal-an nga duha ka lalaki ug isa ka babae nga miyembro sa NPA ang nibalik sa sabakan sa gobyerno.
Atol sa maong seremonya, gipakita usab sa militar ang mga recovered nga mga tag-as nga klasi-klasi nga pusil.
Nahibal-an nga lakang kini sa reintegration program sa gobyerno ug usa sa mga ni-surrender ang nakadawat ug ₱100,000.00 nga pinansyal nga tabang, usa ka saad nga gipamulong pa sa miaging administrasyon kaniadtong Hunyo 27, 2025, apan karon natuman pinaagi sa panaghiusa ug suporta ni Mayor Castillanes ug Congressman Flores.
Ang maong pag-surrender sa tulo ka NPA members, nagpakita nga adunay paglaom nga magbag-o pinaagi sa tabang sa gobyerno, kasundaluhan, kapulisan ug Lokal Government Unit sa Cabanglasan para makab-ot ang hapsay, kalinaw ug mabungahon nga lungsod.