Sa padayon nga paningkamot sa Lokal nga Pangagamhanan sa Dakbayan sa Valencia nga mapalambo ang dialysis services, pormal kini nga nakig-alayon sa Ajora Via Medical Corp. ug Aguanta Medical and Diagnostic Center Corporation pinaagi sa pagpirma sa Memorandum of Agreement (MOA) niadtong Oktubre 28, 2025.
Pinaagi sa maong panagsabot, gilauman ang pagestablisar sa usa ka Dialysis Center nga magapalapad sa paghatag og accessible ug quality nga dialysis services, nga ibutang puhon sa CHO Annex Building (Daang German Doctors Building) alang sa mga residente sa Valencia City ug sa kasikbit nga mga lugar.
Lakip sa maong serbisyo ang paghatag og libre o discounted nga dialysis services alang sa mga PhilHealth-enrolled nga pasyente, pinaagi sa rekomendasyon ug sertipikasyon sa City Government. Gisiguro usab nga ang dialysis center magpatuman sa No Balance Billing sa tibuok panahon sa kasabotan, diin ang tanan nga kwalipikado nga pasyente sa PhilHealth hemodialysis benefit package matambalan nga walay dugang bayad, basta ang tanang treatment sakop sa PhilHealth benefit package sa oras sa pagpatambal.
Gipangulohan ang maong pagpinirmahay ni City Mayor Amie Galario, Vice Mayor Greizl Galario-Fernandez, ug Councilor Jerusha Cadigal-Recla, RN, Chairperson sa Committee on Health, kauban usab ang mga representante sa maong partner medical group nga manguna sa pagdumala sa center, sila Dr. RJ Aguanta, Ms. Daisy Estrada, ug Dr. Eyal Shtoroch.
Gipasiugda ni Mayor Galario sa iyang mensahe nga ang maong inisyatiba nagpakita sa tinud-anay nga serbisyo alang sa katawhan, diin ang pagpalambo sa sektor sa panglawas usa sa mga prayoridad sa iyang administrasyon.
Gikalipay usab ni Vice Mayor Galario-Fernandez ang maong kalamposan nga dakong tabang alang sa mga nanginahanglan og espesyal nga medikal nga pag-atiman.
Samtang si Konsehal Jerusha “Sasang” Cadigal-Recla nagpahayag sa iyang pagpasalamat ug kalipay tungod sa kasabutan nga matod pa niya usa ka milestone para sa dakbayan.
Alang usab sa gusto nga maka-avail sa maong dialysis services mahimong magpalista ani nga form: https://forms.gle/fYEr2jm28z3NVC6g8