Naluwas ang usa ka batang babae ug patay ang nanghostage nga gitu-ohang usa ka drug addict human nga gigulgol sa suspek ang liog sa maong bata rason nga gipusil kini sa pulis sa Dansalan ug Sangkay sa Marawi City, Lanao del Sur takna 7:50 sa buntag adtong Domingo, Disyembre 21, 2025.
Nahibal-an nga ang maong suspek nipugos ug sulod sa usa ka pinuy-anan ug kalit lamang gi-hostage ang maong batang babae.
Usa ka pulis ang nagpasi-ugda ug malinawon nga negosasyon arun buhian ang biktima peru sa wala’y pagduha-duha, kalit lang mas nag-agresibo ang maong suspek ug gigulgol niini ang liog sa biktima, rason nga gipusil sa pulis ang suspek gamit ang issued firearms arun maluwas sa kamatayon ang batang babae.
Daling gidala ang biktima nga anaa na sa luwas nga kahimtang samtang gideklarang dead-on-arrival ang suspek.
Ang paspas nga aksyon sa maong pulis nagdala ug kaluwasan sa batang babae nga biktima, ug ang panghitabo pahinumdom nga ang iligal nga droga makadaot ug wala’y laing dala kundi kagubot sa atong palibot.