Malampusong gipahigayon ang Youth Night 2025 nga giorganisa sa lokal nga pangagamhanan pinaagi sa Valencia City Youth Development Office (VCYDO) niadtong Disyembre 30 sa Valencia City Gymnasium, Bikidnon.
Gitambongan ang kalihokan ni Mayor Amie Galario kauban ang iyang bana nga si First Gentleman Jun Galario, diin gipadayag sa Mayor ang suporta sa lokal nga pangagamhanan sa sektor sa kabatan-onan.
Sa iyang mensahe, gibug-aton niya ang mahinungdanong papel sa mga batan-on isip mga kaabag sa kalamboan ug kalinaw sa dakbayan, ug isip mga lider sa umaabot nga henerasyon.
Nagpaabot usab og mensahe si Vice Mayor Greizl Galario-Fernandez pinaagi sa iyang anak nga maoy nirepresentar kaniya, diin iyang gidasig ang kabatan-onan nga magpadayon sa aktibong partisipasyon sa mga kalihokan sa komunidad ug magpabiling ehemplo sa disiplina ug panaghiusa.
Mitambong usab si SK Federation President John Legel Estoquia, nga mipaambit sa iyang kadasig ug paglaum sa padayon nga kooperasyon sa nagkalain-laing SK Councils sa matag barangay sa dakbayan.
Napahigayon ang kalihokan pinaagi sa pakigkugi sa VCYDO ubos sa pagpangulo ni Francis Oliver Awiten, isip usa ka higayon sa panagtapok, panaghiusa, ug kalingawan sa mga kabatan-onan sa Valencia City, ug kabahin sa padayon nga paningkamot sa lokal nga pangagamhanan sa pagpalig-on sa aktibong partisipasyon sa sektor sa kabatan-onan kauban ang Sangguniang Kabataan ug mga Youth Organization sa dakbayan.
PIAD | Report: Jay Fernandez-Ara
Photos: Ree Diarota