Nadakpan ang walo ka high-value target ug nabungkag ang usa ka drug den sa hiniusang operasyon sa mga awtoridad atol sa buy-bust operation niadtong Abril 23, 2026 sa Rosary Heights 10, Cotabato City.
Gipangulohan ang operasyon sa Philippine Drug Enforcement Agency (PDEA) Maguindanao del Norte Provincial Office uban ang nagkadaiyang yunit sa kapulisan, lakip ang City Mobile Force Company (CMFC), City Intelligence Unit sa Cotabato City Police Office (CIU-CCPO), City Intelligence Team (CIT), Regional Intelligence Unit 15 (RIU 15), ug PNP Maritime Police.
Sa maong operasyon, nakuha sa mga awtoridad ang 15 ka pakete sa gituohang shabu nga adunay gibana-banang gibug-aton nga 25 gramos ug kantidad nga moabot sa P170,000. Narekober usab ang duha ka Android mobile phones, buy-bust money, ug nagkadaiyang identification cards.
Gikilala ang mga nadakpan pinaagi sa ilang mga alyas nga “Nor” ug “Ode,” nga giingong mga maintainer sa drug den, uban sa ilang mga kauban nga sila “Pots,” “Bai,” “Yam,” “King,” “Datu,” ug “Esmael.”
Sa pagkakaron, anaa na sa kustodiya sa mga awtoridad ang mga suspetsado alang sa hustong disposisyon. Atubangon nila ang kasong paglapas sa Republic Act 9165 o ang Comprehensive Dangerous Drugs Act of 2002.
Padayon ang lig-on nga kampanya sa mga awtoridad batok sa ilegal nga droga sa rehiyon isip kabahin sa mas lapad nga paningkamot aron mapugngan ang kriminalidad ug mapreserbar ang kalinaw ug kahapsay sa komunidad.