Nagpahayag ang Moro Islamic Liberation Front (MILF) nga ang mosunod nga hugna sa implementasyon sa 2014 Comprehensive Agreement on the Bangsamoro (CAB) magpunting na sa sibilyang pangdumala ug pagpalig-on sa mga institusyon.
Gipasiugda kini ni MILF Peace Implementing Panel Chair Mohagher Iqbal samtang iyang giabiabi ang pagkakatalaga ni Mel Senen Sarmiento isip bag-ong kalihim sa Office of the Presidential Adviser on Peace, Reconciliation and Unity (OPAPRU).
Sumala ni Iqbal, ang pagpatuman sa nahibiling bahin sa kasabutan dili na lamang may kalabotan sa seguridad, kundili usa na ka sibilyang buluhaton nga nagkinahanglan og halapad nga kasinatian sa pangdumala. Importante, matod niya, ang eksperyensya ni Sarmiento sa lokal ug nasyonal nga gobyerno, lakip ang koordinasyon tali sa nasyonal nga panggamhanan ug sa Bangsamoro Autonomous Region in Muslim Mindanao (BARMM).
Gipulihan ni Sarmiento si kanhi OPAPRU Secretary Carlito Galvez Jr., nga bag-o lang mipahawa sa posisyon.
Si Sarmiento usa ka beteranong lingkod-bayan nga nagsilbi isip kongresista sa unang distrito sa Samar, mayor ug bise mayor sa Calbayog City, ug nahimong kalihim sa Department of the Interior and Local Government (DILG).
Gipasiugda usab ni Iqbal nga bisan pa man sa mga nakab-ot nga kalampusan sama sa pagpasa sa Bangsamoro Organic Law ug pagsugod sa decommissioning sa mga kanhi mandirigma sa MILF, daghan pa ang kinahanglan buhaton.
Lakip sa mga prayoridad ang pagpadayon sa normalization process, pagpalig-on sa fiscal ug governance capacity sa BARMM, pagsiguro sa malinawon ug kredibleng parliamentary elections, ug paghatag og kauswagan sa mga komunidad nga naapektuhan sa kagubot.
Giingon ni Iqbal nga andam ang MILF sa pagpadayon sa hugot nga pakigtambayayong sa gobyerno aron matuman ang tanang nahibiling obligasyon ilalom sa kasabutang pangkalinaw.
Matod pa niya, ang kaugmaon sa Bangsamoro nagasalig sa malampusong paghuman sa mga nasugdan ubos sa CAB.
Source: StarFm Cotabato