Nadakpan ang 20 ka dayuhang Tsino sa magkabulag apan konektadong operasyon sa mga awtoridad sa Eastern Mindanao niadtong Abril 22, 2026.
Ang operasyon gipangulohan sa Eastern Mindanao Command (EastMinCom) uban sa Bureau of Immigration sa mga lugar sa Pantukan, Davao de Oro ug Tagum City, Davao del Norte.
Sumala sa mga awtoridad, nadakpan ang mga dayuhan tungod sa giingong paglapas sa Philippine Immigration Act human masangkot sa wala’y otorisasyon nga mga kalihokang pang-ekonomiya sa nasud.
Padayon pang giimbestigahan kung adunay kalabutan ang mga nadakpan sa ilegal nga pagmimina ug uban pang supak sa balaod nga operasyon. Gisusi usab kung adunay koneksyon ang ilang kalihokan sa mas dagkong transnational criminal networks.
Karon, anaa sa kustodiya sa Bureau of Immigration ang mga dayuhan samtang ginahimo ang beripikasyon sa ilang mga dokumento ug immigration status. Giandam na usab ang deportation proceedings batok kanila kung mapamatud-an nga nakalapas sila sa mga balaod sa nasud.
Dungan niini, gitun-an usab sa mga awtoridad ang posibleng paglapas sa Philippine Mining Act of 1995 may kalabutan sa ilang mga kalihokan.
Gipasabot sa EastMinCom ang padayon nga pasalig niini sa pagpatuman sa balaod, pagpanalipod sa likas nga kahinguhaan sa nasud, ug pagmintinar sa kalinaw ug seguridad sa rehiyon. Giawhag usab niini ang publiko, lokal nga panggamhanan, ug uban pang ahensya nga magpabiling alerto ug dayon ireport ang bisan unsang kahina-hinalang kalihokan sa ilang komunidad.
Source: StarFM Cotabato