Sabay sa init nga panahon karong summer, mainiton usab nga gidawat sa mga Kabataang Tagumenyo ang paglunsad sa Tagum City Summer Sports Clinic 2026 kaniadtong Abril 29, 2026 sa Rotary Basketball Gymnasium, ubos sa pagpanguna sa Tagum City Youth and Sports Development Office (TCYSDO).
Ang programa nagtigum sa mga atleta ug coach gikan sa 20 ka disiplina isip nag-unang grassroots sports initiative sa siyudad, nga abli sa mga bag-ohan hangtod intermediate nga atleta ubos sa giya sa mga eksperyensiyadong coach.
Mitambong sa maong seremonya ang pipila ka lider sa siyudad, lakip sila Coun. Ciara Isabelle Uy-Salazar, Coun. Romeo Catayas, Coun. Wes Caasi, Coun. Agripino Coquilla, Coun. Rex Jasper Aala, Coun. Uloy Ong, ug Coun. Roan Angela G. Rillon, nga nagpakita sa ilang padayon nga suporta sa mga programa sa kabatan-onan pinaagi sa isports.
Ang Summer Sports Clinic nagtumong sa pagdiskobre ug pagdasig sa aktibong partisipasyon sa kabatan-onan sa natad sa isports. Nakatutok usab kini sa pagpalig-on sa active ug healthy lifestyle sa komunidad, nga nagmugna og mas disiplinado ug mas himsog nga kabatan-onan alang sa umaabot.