Nagmalampuson ang duha ka adlaw nga “Summer Big Brother: Reading is Fun” in-house training alang sa mga Tagumenyong Youth Volunteers kaniadtong Mayo 8–9, 2026 sa Laureta Elementary School, Tagum City, Davao del Norte.
Kini kabahin sa Project Reading Empowers Youth, usa ka 30-hour summer reading camp ubos sa ARAL Program nga nagtumong sa pagtabang sa mga kabataang naglisod sa pagbasa ug pagkat-on.
Nagpakita usab og hugot nga suporta sila Hon. Rex Jasper Aala, Chairperson sa Committee on Education, ug Hon. Ciara Isabelle Uy-Salazar, Vice-Chairperson sa maong komitiba, pinaagi sa ilang mensahe sa pagdasig ug pagpasalamat sa dedikasyon sa mga volunteers nga naggahin og panahon aron makatabang sa mga batang nagkinahanglan og suporta sa pagbasa.
Ang maong programa usa ka hiniusang paningkamot sa Lokal nga Panggamhanan sa Tagum ubos sa pamuno ni Mayor Rey T. Uy, sa pakigtambayayong sa Department of Education (DepEd) ug University of Southeastern Philippines (USeP–Tagum Campus). Dugang pa, naghatag usab og suporta ang mga establisemento sama sa Papa G Dimsum House, San Miguel Brewery, Inc., Hexat Mining, Inc., alang sa kalampusan sa maong programa.
Pinaagi niini nga inisyatiba, gilauman ang mas epektibong serbisyo sa mga Youth Volunteers aron mas makatabang sa mga struggling readers. Kini nagpamatuod sa lig-on nga panag-uban sa gobyerno ug sa pribadong sektor alang sa pagpausbaw sa kalidad sa edukasyon sa Tagum.