Isip kabahin sa seryosong tinguha alang sa usa ka limpyo, hapsay, ug masaligan nga serbisyo publiko, gipahigayon sa Lokal nga Kagamhanan sa Dakbayan sa Valencia ang Mandatory Drug Testing Program niadtong Hunyo 2, 2026, didto sa City Hall Covered Court, Valencia City, Bukidnon.
Ang maong padayon nga lakang gitambongan ug gipartisiparan sa gatosan kapin nga mga regular ug casual nga empleyado gikan sa mga piho nga departamento ug grupo sa LGU. Gilangkuban kini sa City General Services Office (CGSO), City Environment and Natural Resources Office (CENRO), City Traffic Management Office, CADSUT, Executive Assistants (EA), ug City Mayor’s Back-Up.
Kini nga inisyatiba gipatuman ubos sa hiniusang paningkamot ni Mayor Amie Galario, inabagan sa 10th Sangguniang Panlungsod ubos sa pagpangulo ni Vice Mayor Greizl Galario-Fernandez. Tumong sa maong administrasyon nga masiguro nga ang tanang nagserbisyo sa gobyerno makatampo sa pagmintinar sa kalinaw ug magpabiling luwas gikan sa impluwensiya sa ginadiling droga.
Aron mapakita ang hugot nga kampanya batok sa ginadiling droga, giklaro ni LGU Spokesperson Jun Galario ang posibleng dangatan sa kinsa mang empleyado nga mapamatud-ang positibo sa paggamit niini human sa confirmatory test.
Sumala ni Galario, walay sutaon ang administrasyon sa pagpatuman sa maong polisiya aron mapreserbar ang integridad sa serbisyo publiko. Alang sa mga casual employees, mag-atubang sila og dinaliang pagtangtang sa trabaho o dili pagbag-o sa ilang kontrata. Samtang alang sa mga regular employees, hatagan sila og 15 ka adlaw aron mosurender ngadto sa mga hingtungdang awtoridad ug moagi sa tukmang proseso sumala sa mga lagda sa Civil Service Commission (CSC).
Dugang pa niini, gipahibalo sa pamunoan nga dili kini mao ang katapusang lakang. Gilauman nga adunay kalit o random drug testing sa umaabot nga mga adlaw alang sa tanang Job Order (J.O.) workers sa LGU aron masiguro nga ang tibuok pwersa sa kagamhanan magpabiling limpyo gikan sa ginadiling droga.
Matod pa sa pamunoan, ang pagbaton og “Drug-Free Workplace” mahinungdanon aron mapadayon ang taas nga kalidad sa serbisyo ug mapalig-on ang pagsalig sa publiko ngadto sa mga mamumuo sa gobyerno. Ang kapakyasan sa pagtuman niini nga kamandoan nga walay balidong rason mahimong mosangpot sa tukmang silot sumala sa naglungtad nga mga patakaran.
Gilauman nga ang resulta niini nga drug testing program magsilbing sumbanan sa pagmintinar sa disiplina, integridad, ug propesyonalismo sa matag departamento aron mas mapalambo pa ang paghatag og de-kalidad nga serbisyo ngadto sa tanang Valencianos.