Usa na usab ka mahinungdanong kadaugan ang nadawat sa Lokal nga Panggamhanan sa Tagum human kini gideklara isip Champion sa ARTA 2026 Ease of Doing Business (EODB) Month Reels Making Contest nga gipasiugdahan sa Anti-Red Tape Authority (ARTA).
Gihatag ang maong pag-ila karong adlawa, Hunyo 1, 2026 atol sa EODB Month Culminating Activity sa UP Ayala TechnoHub, Quezon City, nga gitambungan online sa mga personahe sa City Information Office (CIO) pinaagi sa Zoom video conferencing.
Ang CIO-Tagum usab ang nangulo sa paghimo sa maong EODB entry nga nagpakita sa mga inobatibong lakang aron mas mapadali ug mas mapahapsay ang paghatag og serbisyo ngadto sa katawhan.
Gihatagan og dakong pagtagad sa winning entry ang digital ug customer-centered initiatives sa lokal nga panggamhanan sama sa Interactive Kiosk, E-Rehistro, ug Electronic Business One-Stop Shop (E-BOSS), nga nagpadali sa pag-access sa impormasyon, online registration, ug proseso sa business registration ug renewal.
Ang maong kadaugan nagpakita sa lig-on nga paningkamot sa lokal nga panggamhanan ug kolaborasyon sa mga opisina sa siyudad, sa pagpalambo sa ease of doing business ug sa paghatag og mas accessible nga public service, nga nagpalig-on sa Tagum isip modelo sa digital innovation.