Gipaabot sa lokal nga panggamhanan sa Pigcawayan ang ilang dakong pasalamat sa nasyonal nga gobyerno ubos sa liderato ni Presidente Ferdinand R. Marcos Jr. alang sa rice assistance nga nadawat sa 28 ka barangay sa lungsod niadtong Hunyo 6, 2026.
Ang gipang-apod-apod nga tig-10 ka kilong bugas ngadto sa 17,913 ka pamilya, nga adunay kinatibuk-ang kantidad nga kapin sa P5.9 milyon, kabahin sa P169 milyon nga pondo gikan sa Local Government Support Fund.
Tumong niini ang paghatag og tabang sa mga lumulupyo nga naapektuhan sa pagsaka sa presyo sa mga batakang palaliton ug sa inflation sulod sa milabay nga mga bulan.
Nagpasalamat usab si Emmylou ‘Lala’ J. Taliño-Mendoza sa padayon nga suporta sa nasyonal nga gobyerno ngadto sa mga programa nga naghatag og direktang ayuda sa katawhan.
Matud pa niya, dako kining nahatag nga kahupayan ilabi na sa mga pamilyang padayon nga nag-atubang sa hagit sa nagkataas nga gasto sa adlaw-adlaw nga panginabuhi.