Gi-instalar ang 15 ka pickleball-inspired Artificial Coral Reef (ACR), sulod sa Marine Protected Area sa Brgy. Liboganon karong adlawa, Hunyo 19, 2026, ubos sa hiniusang paningkamot sa LGU-Tagum, Davao del Norte pinaagi sa City Agriculture Office, Bantay Dagat, ug BJMP Tagum–Male.
Sa paggamit sa usa ka disenyo nga inspirasyon gikan sa nagkasikat nga sport nga pickleball, gipakita sa siyudad ang paghiusa sa inobasyon ug environmental stewardship alang sa coastal resource management ug sustainable fisheries development.
Gikahinumduman nga nagsugod ang pag-instalar sa Artificial Coral Reef kaniadtong tuig 2007 subay sa City Ordinance No. 249 o ang Comprehensive Fisheries Code of Tagum, isip kabahin sa pag-establisar sa Tagum City Fish Sanctuary.
Sa pagkakaron, kapin 6 ka ektarya na ang na-instalar nga artificial coral reefs, ug tumong sa Lokal nga Panggamhanan sa Tagum, ubos sa liderato ni Mayor Rey T. Uy nga sa umaabot mapuno sa ACR ug natural coral reefs ang tibuok 22 ka ektarya nga Marine Protected Area sa syudad.
Gilauman nga makatabang ang artificial coral reef sa pagdugang sa coral cover, pagpadaghan sa populasyon sa mga isda, ug masuportahan ang panginabuhi sa mga mangingisda nga nagsalig sa kadagatan isip ilang pangunahing tinubdan sa kita ug pagkaon.