Patay human gipusil sa wala pa mailhing mga suspek ang usa ka school principal sa Barangay Salbu, Datu Saudi Ampatuan, Maguindanao del Sur, pasado 8:00 sa buntag karung adlawa, Miyerkules, November 18, 226.
Giila ni Police Captain Steffi Salanguit, Spokesperson, Police Regional Office Bangsamoro Autonomous Region, ang biktima nga si Dionel Villabito Mahusay, school principal sa Pendililang Elementary School, nga residente usab sa Barangay Salbu, Datu Saudi Ampatuan.
Base sa taho, bag-o pa lang migikan ang biktima gikan sa iyang panimalay sakay sa iyang minivan dihang giduol kini sa mga suspek ug gipusil.
Naigo siya sa nagkadaiyang bahin sa iyang lawas nga maoy hinungdan sa iyang hinanaling kamatayon.
Wala na naabtan sa mga mirespondeng pulis ang biktima sa nahitaboan tungod kay gidala na kini sa iyang pamilya balik sa ilang balay.
Nagpahigayon na og hot pursuit operation ang kapulisan ug nagpadayon ang lalom nga imbestigasyon aron mailhan ug madakpan ang mga kriminal ug ang motibo sa maong krimen.